స్విట్జర్లాండ్ అధ్యక్షురాలు మైకేలిన్‌ క్యాల్మిరె సోమవారం చరిత్రాత్మకమైన చార్మినార్‌ కట్టడాన్ని సందర్శించారు. ఈ సందర్భంగా భారీ పోలీస్‌ బందోబస్తును ఏర్పాటు చేశారు. చార్మినార్‌ పరిసర ప్రాంతాలలో రోడ్డుకు ఇరువైపులా బందోబస్తును ఏర్పాటు చేసి ఎటువంటి అంతరాయం కలగకుండా చర్యలు తీసుకున్నారు. మైనార్టీ సంక్షేమ శాఖ మంత్రి షబ్బీర్‌ అలీ, ఇతర ఉన్నతాధికారులతో కలిసి ఆమె సాయంత్రం చార్మినార్‌ను సందర్శించారు. అక్కడ ఏర్పాటు చేసిన ఫొటో ఎగ్జిబిషన్‌ను తిలకించారు. పురా వస్తుశాఖ సూపరింటెండెంట్‌ డాక్టర్‌ డి.జితేందర్‌దాస్‌ చారిత్రక కట్టడం గురించిన విశేషాలను వివరించి చార్మినార్‌ మెమొంటోను బహూకరించారు.